Gusto ko sanang ipaalam sa iyo
kung gaano na kabigat ang pagdilat.
Ninanakaw mo
gabi-gabi
siguro ang buwan
at sa aking talukap ikinukubli?
Pero parang may iba
pang dumadagan.
Huwag mong sabihin
na ikaw rin ang nagbibitin
ng mga bituin
sa aking pilikmata?
Pero hindi ba, ako
ang nangako sa iyo
ng buwan
at mga tala? Naalala ko
na ako
ang nangako. Hindi ako
ang lilimot. Wala na
sanang buwan at bituin
sa gabi bago
ako matulog.
No comments:
Post a Comment